我與Anglelababy有緣

剛看電視tvb的《東張西望》, 知道了一個驚人的消息, 原來.................










我與萬千宅男的女神 Anglelababy 是同一日生日架!!!

唔知點解, 我竟然覺得好興奮, 低低地.......



我在想, 那我同Anglelababy的性格會不會有點相近?

我們會唔會好夾?

不過, 想深層, 我就知我們唔似

起碼, 我唔鍾意 William

C人

我愛大家

大家對我的好真的意科之外, 好到連我自己都有點唔好意思

感謝每一位朋友的祝賀, 無論是有到場的, 陪我去海洋公園的, 或是在facebook, msn 同sms留言, 小弟都很謝謝各位的厚愛, 我都沒有為大家做過什麼, 反而令我知道我己經擁有了很多

今年許願時, 心裏真的希望身邊所有人都開心過日子, 最重要是身體健康

最後, 小弟無以為報, 只好賣身肉償, 為大家拍下一輯照片, 希望為大家在facebook上獲得一點歡樂

我愛大家!!

C人

facebook一家親

我以前在yahoo寫的blog都有提過, 我所有家人都有玩facebook

包括我媽媽, 妹妹, 阿姨, 大舅父, 二舅父, 二舅母, 表哥, 幾個表姐, 幾個表弟, 幾個表妹.............

對呀, 我屋企人會用facebook來互通消息同搞活動, 我都覺得好勁


其實...........我的好就是我份人夠真

所以, 家人在facebook見到我過的是什麽生活, 識的是什麽人 , 我從來沒有刻意隱瞞, 亦沒有打算開兩個facebook户口, 分開屋企人同朋友, 或者將相簿加鎖之類

我呀媽有問過我: 仔, 乜你facebook度有咁多大隻靚仔朋友

我答: 係呀, 呀媽你要唔要識番個


我知, 我所有家人其實都知我的事, 他們最鍾意久不久講些有暗喻的對話(近期例子Re-member)

我曾經有懷疑過他們是否為我開一個賭盤, 看看誰能夠引我出櫃

不過, 我的立場是.......一動不如一靜

我的家人其實好好, 他們亦心中有數, 又沒有歧視

只是,我真的覺得冇需要再去解折什麽


我咁man, 仲有乜好解析

C人

世上仍有很多愛

能夠找到一個人, 在你患上不治之症時仍然不離不棄, 陪你勇敢地去面對, 給予支持同照顧, 是多麽難能可貴的一件事

或許當下, 你會毫不考慮地向對方承諾願意承擔

不過真正發生在自己身上時, 又有多少人能夠做到?

雖知要走的路, 有時並不是一年半載的事

當中需要有無比的毅力同愛, 才能支撑下去

就算對方做不到, 亦不要介意

只因為那個人懦弱, 不夠勇氣罷了, 就由他走吧

勉强得來的, 留下亦沒有用


近日, 看着電視節目中細說米雪同尹志強的廿載情

令我還相信

這並不是只會在電影橋段內才發生的事

現實世界中, 原來仍有很多愛

C人

換轉是我

換轉是我

我希望對方能夠盡快從悲痛的谷底出走來

繼續好好地過自己的生活

然後, 遇上一個值得愛的人

代替我, 好好照顧他

我相信

朋友也是這樣想的

C人

慎言

言詞有時比真刀實彈更能傷人

所以, 可以的話

有時侯, 盡管心底裡有很多話想說, 說之前亦請嘗試想想後果

其實, 可能根本沒有人在意你的想法

不過當你的一字一句傷害到對方時, 那就是另一回事

我們要學懂慎言

C人

Remember

舅母的哥哥是同道中人

最近, 他在銅鑼灣開了一間Oyster Bar 叫 《Remember》

大年初一當日, 舅母把卡片給我, 着叫我可以介紹朋友去吃

與此同時, 舅父上前搭訕

舅父說: 佢間Bar 叫 Remember, 當中叫Member 一定係有啲含意嘅, 聽講好多Member去食架, 阿偉, 你知唔知Member點解?


我望一望舅父, 再望一望張卡片, 徐徐答道



C人: 其實我唔鍾意食生蠔的.........

我知我知, 我個答案好爛, 係咁


C人


PS. 這篇不是鱔稿, 不過既然話咁多Member去, 我亦不妨介紹給大家

Remember Oyster Bar
Booking Hotline: 91919195
Shop: 14/F 485 Lockhard Rd,
Evernew Hse, CWB

全城熱戀娃娃娃

在年初二寒冷的晚上, 收到這個令人沸騰的消息

的確是新春第一件美事, 是一件大事, 歷史性的一刻, 你信我, 北京舉辦奧運, 我都沒有這麽亢奮

愛情來了, 無論當初各自點睇大家唔順眼, 但緣份要來的時候, 的確要擋也擋不住

請放心, 告佈時所有朋友的歡呼聲, 已經是大家支持最好的證明


只可惜朋友升呢做了貴妃, 學習日後做一個受人愛戴的娘娘,

從始小人就少了一個在司珍房共事的好朋友

不過朋友你說好話, 存好心, 做好事, 這都是你應得的


你們的事令到其他單身的朋友對戀愛重燃希望

亦令我明白三個人生大道理

第一, 朋友聚會千萬不要太早離場, 否則睇少好多事情, 高潮永遠在最後

第二, 山草藥不要亂隊, 不可一, 不可再

第三, 亦是最重要的一項, 就是.........

做鷄的千萬不能同客人接吻


祝福你們!!

C人


F4: 全城熱戀娃娃娃

虎前

近兩星期每晚都有不同的團年飯吃, 乜事呢, 未過年就吃到有點膩, 我今日午餐最想吃的竟然是白粥

家中算大掃除了一次, 連廁所都洗了, 不過天氣實在太熱太潮濕, 好像所有家具都唔乾淨咁, 我要開冷氣抽濕

明天去剪髮, 髮型師話要同我電髮講足兩個月, 好驚囉, 都唔知會電成點, 而且為了電髮. 我這個月來都不敢將頭髮剪得太短. 搞到把頭髮好難打理同好肉酸, 快快了解件事, 唔該

加了人工, 出咗雙糧, 連花紅都出了

不過我半點兒興奮的感覺也沒有

正如《蜘蛛俠》的一句對白: 一個人能力越大, 責任越大....

突然間膊頭好重........

C人

偏偏

陳百強有首歌叫做《偏偏喜歡你》, 我覺得是本世紀最慘的情歌之一

偏偏兩個字好絕, 你話世上有這麽多好人, 好揀唔揀, 偏偏喜歡上一個不值得去愛的人, 係咪好慘

正如永遠最需要趕時間的時候, 偏偏街上一輛的士都無嘅情況一樣

最攞命的是, 當你最邋遢, 最不修邊幅的裝扮落街, 偏偏就遇到熟人

唉, 我這份人, 失敗在於永遠都學唔精

都說〝機會是留俾有準備的人〞

剛落街在附近的一間Bago店買午餐, 這間Bago店只是在我住的大廈鄰近幾個鋪位左右

我的打扮是這樣的, 瞓醒未梳充滿頭油的頭髮, 黑框眼鏡, 未剃鬚, 身上穿着一件殘舊不堪, 只會在屋企才會着的衛衣, 短褲加拖鞋, 基本上同道友冇乜分別

在我落單之際, 感覺有人同我打招呼, 一轉身

Shit, 是一個舊相好

我呢, 期望遇到熟人的地方, 場景是在酒吧,Party, 或者充滿藝術氣息的畫廊之類, 打扮入時, 好有自信地同對方講聲hi, 令人眼前一亮那一類

偏偏俾人見到我道友個樣, 唉, 真係千年道行一朝喪

以後落街, 真係要着到去飲先得

C人

我把聲。好難聽

雷四生日新碟發佈簽唱會當晚, 我負責將唱片送給他, 當中包括一段簡短的講詞

有朋友錄成短片並放上雷四的fans club 上, 我生平第一次真正好清楚聽到自己把聲

好。撚。難。聽!!!!

唔知大家係咪都會唔習慣聽自己把聲

但我真係覺得自己把聲好難受, 細路仔聲, 一啲都唔man, 語調哦哦, 黐利根, 多尾音, 又呢又呀咁樣, 總之係好好好好好難聽

平時朋友同我談話是不是在受罪? 邊有人容忍到同一把鷄仔聲在談心?

一大清早接受不了現實, 心情好灰

C人

雷四生日新碟發佈簽唱會

昨日是傳奇樂壇弱女 雷四 推出闊別樂壇三年以來最新大碟 《雷 射精 選》大日子

唱片公司為隆重其事, 特於雷姐生日前一晚於尖沙咀某餐廳舉行生日新碟發佈簽唱會, 與一班一直默默支持他多年的歌迷同樂, 歡度一個值得紀念的晚上

雷姐昨晚心情勁靚, 演唱多首名曲, 除了《西face嚇gay》及《黑洞很危險》之外, 並翻唱多首其偶像Kelly陳慧琳的舞池作品, 包括《戀愛神經》, 《花花世界》以及《大日子》........

唱片公司並於派對途中, 宣佈一個令人鼓舞的消息, 就是《雷 射精 選》上市短短一日內銷量己經突破五萬張, 唱片公司同時頒發金唱片給雷姐, 以肯定雷姐為新大碟作出的努力, 為現今日漸萎縮的香港樂壇打下一支强心針

未來一年, 雷姐透露計劃推出一張 fuck 陰大碟, 並嘗試進軍影壇, 打頭炮是2月14日全球上畫的荷里活電影《寂寞都有罪》, 希望fans 多多支持

雷姐成為國際巨星的道路, 又踏上重要的一步


西瓜日報記者: C人

雷 射精 選

當你見到這篇blog的時候, 無錯

千呼萬喚, 傳奇樂壇弱女 雷四 最新大碟 《雷 射精 選》經已隆重上市





不要問我在那裏有得賣

仙緣這回事 真是可遇不可求

建議你可以去旺角砵蘭街碰碰運氣

Happy Birthday 呀! 肥四

C人

夢幻星座情人

兩個人能夠在一起, 要求是什麽

我以前會想, 是否要對的時間, 對的地方或者對的人

是否要講緣分, 門當户對, 面相八字, 生肖星座要相襯

雙魚最好配巨蟹, 白羊最好配人馬, 金牛最好配摩羯

理想的情人, 最好有金牛座的成熟, 巨蟹座的居家, 獅子座的活力, 人馬座的野性, 雙魚座的温柔

太夢幻了, 試問現實怎可能有人集十二星座的優點於一身?

其實都沒有星座配對這回事

再相襯都不過是兩個個體

可以談戀愛, 就盡量享受當中的過程吧, 其他的都不要計較那麽多

兩個人知己知彼, 你才能夠包容善變的水瓶, 忍耐挑剔的處女, 妥協自私的天蠍, 體諒任性的雙子, 接受溫柔寡斷的天秤

能夠接受對方缺點,願意付出, 試着了解互相磨合, 這才是真正在一起的要求

就算雙方都很努力包容, 到最後還是不能在一起的話, 想得透切一點, 其實也沒有什麽好壞理由

愛一個字, 不愛兩個字

就是這麽簡單

(我好似寫咗篇《我阿媽是女人》一樣, 廢話到呢.........)

C人

星星.月亮.太陽系列
F4:讓月亮伯伯看見彩虹
WWW: 陽光

貪

其實你問我十億同千億有什麽分別, 我真的答不到你

我此等小市民, 假如有一億都己經唔駛做啦, 日日數銀紙數一世都數唔完

邊有人可以咁貪心? 十億唔夠用要爭千億, 慾望尤如那些風水坑, 越掘越多, 越掘越大

我信賤男的遺囑是真的, 一個女人, 老公失蹤多年, 怎會不寂寞? 尤其是以她的財力, 任何稀世珍品都隨手可得的時候

唯獨真愛, 有時不是話有就有

問題是, 賤男一直以真愛作辯, 女方才將所有遺產留給他, 好心啦, 自己屋企還有老婆仔女, 呀水都知你貪錢, 那裏有愛?

愛並不是一齊着情侶裝, 一齊旅行, 叫聲老公豬就叫做愛

向一個寂寞失常的女人落藥, 就算遺囑是真的, 社會各界人仕點會俾你打嬴官司, 法官判他嬴都真係唔駛再起法律界立足

他衰在一個字: 貪

C人

阿媽中了六合彩

母親申請了一個醫院的治療計劃

計劃詳情大概是這樣的, 這是一隻新的治癌藥物, 需要在全球選八千名病患者參與研究計劃, 被選中的對象可獲提供免費藥物治療, 以及十年內得到院方的病情跟進

單是藥費就己經價值數十萬元

前兩天我還同母親笑說, 假若抽中的話, 我即刻要去買六合彩

結果今晚母親致電給我, 說真的被抽中了, 可以參加這個療程計劃

幸運如同中了六合彩

下星期三千八百萬的新春金多寶, 我一定落重注

C人

我想識你 dot com

在網上社交, 首要做嘅係拍一輯靚相

任何事情都是講包裝, facebook有成千千萬萬個profile, 朋友link埋都一大堆, 要在云云對手中吸引新朋友add 你, 當然要有一張吸引人目光的照片

至於怎樣為之一張適合的照片, 那要視乎你希望給人的形象

要健康, 性感, 親切, 可愛還是有型? 唔係真性情唔緊要, 相片的目的本來就是用作呃人, 齋睇相是聽不到你講粗口的

假如有條件的話, 賣肉當然是最佳武器, 無論是認真交友或ONS, 都可以有效節省不少時間在無聊的msn對話上

冇身材唔緊要, 最少要有一個微笑, 記住, 微笑永遠是最好的工具

平常多練習, 得閒多約朋友們聚會, 一起拍照一起練習

朋友是你的照妖鏡, 大家互相交流拍照角度, 表情, 眼神以及動作, 影得多自然有進步

雖然照片是希望最好的一面示人, 但切記照片不要同真人相差太遠, 例如只影半邊面, 柔光效果, 又或者用photoshops執得太勁都不建議

人家見真人反差太大, 那種失落感會有反效果的

最後, 祝願大家早日蜜運成功, 謝謝!

(好X無聊囉這篇............)

C人

鰻魚雞蛋八爪魚

昨日的電影會一口氣看了三部超驚嚇人的爛片

包托宮雪花的《蛇蠍夜合花》, 李華月的《血戀1》四級未刪剪版以及《血戀2》

尤其《血戀1》, 真係好難睇..........食飽咗會想嘔


這套戲一個人睇會支持唔住

要一班朋友一齊睇, 邊嗌 邊驚 邊笑, 乜事呢我哋, 為何要這般虐待自己?

看足三套咸片, 其實我哋係咪先至係最變態


鰻魚喎, 鷄蛋喎, 八爪魚喎

我短期內都唔想食

C人

夢路

我夢見自己同朋友占占在一間貴族學校讀書.......










之後占占 索K 俾警察捉咗.......

好低能的夢

麻煩大家解一解夢, 謝謝!

C人

天下可憐之女

之前提過的朋友E小姐, 相識一個對他十分好的男朋友P先生, 之後日子如浴春風, 不停在facebook曬命

好喇, 三個月了, 故事下文是:

話說他們一齊去睇樓, 簡單說起, 是他們想同居, 不過原來E小姐自己一直想買樓, 所以想屈P先生夾份一齊買, 但又怕P先生唔係佢真命天子, 夾份買樓後俾人呃, 心大心細, 唔知買唔買好, 於是决定走去求風水師父指點迷津


多謝大家花十幾秒去睇完一個咁荒謬的故事, 你知唔知故事想講乜吖?

就是做人作孽太深, 現在驚有報應

你冇害人之心, 又怎會想到人家有害你之意

正如E小姐可能覺得自己無理由找到個對自己好, 話夾份買樓就買樓的男朋友

其實我估她原意是希望一齊睇樓, 然後男方說一句: BB, 不如我買層樓, 落埋你名

P先生條件唔差, 相貌堂堂, 穩定職業, 新界原居民(你知我想講乜), 又溫柔體貼, 照顧週到, E小姐識到這個荀盤應該去還神啦唔該

不過她還可以用男朋友開二手寶馬, 同人家開Benz做比較的

又羨慕人家老公一早有層樓, 有10萬禮金, 望見大大隻鑽石戒指就流哂口水


連自己己經擁有什麽都看不清楚, 只會妒忌他人擁有什麽

我突然間覺得E小姐好可憐

C人

舊文: 攞命三千

兩分鐘的一生

數星期前, 英國的TB表妹越洋打來一通電話, 想請我幫她設計一個紋身圖案

我心中暗叫不妙, 但又沒有辦法推搪, 只好應承

其實紋身是我由二十歲講到三十歲, 想做又唔敢做的事情 , 朋友都笑我冇鬼用, 得個講字

第一, 我怕痛

第二, 我真係諗唔到紋什麽

是一世的, 所以唔想糊亂紋些無意義的圖案上身

今次要紋在他人身上壓力仲大, 好似要負什麽責任似的

不過工作忙, 一直沒有時間畫

直到昨天, 有facebook提示原來是表妹的生日, 才記得自己要交功課

於是我隨手拿起支科學毛筆, 畫咗以下的圖電郵給她



即係呢.... 係草咗少少.....不過唔知你睇唔睇得出, 其實係四個英文字母

料不到表妹回電郵給我, 話好鍾意好鍾意個圖案, 會立刻紋在脚上

我兩分鐘的幾筆, 就成為表妹小腿上一生的烙印

好彩講緊嘅只係紋身

C人

紅白藍三部曲之白色CROCS人

我想說, 其實我都算是一個待人親切, 有禮貌同順得人意嘅好男仔

但某些事情上, 還是會好膚淺的

我知我知, 與人相處最重要是看內在品格, 不能單憑外表去判斷一個人

我都識過好多好仆街嘅靚仔, 又怎會不明白

不過當你要喜歡上一個人, 你話唔睇對方外貌或打扮就呃你嘅

不是看他是否個樣似吳彥祖, 要身穿名牌, 或者打扮一定要追上潮流

有三個字叫做"合眼緣", 至少要令自己眼睛舒服呀

那有什麽打扮會令我眼部不適呢

首推史上最醜的鞋 CROCS !!!

無論有幾多人不喜歡CROCS，似乎又總有更多人喜歡CROCS

我是真心認為, CROCS這東西係唔應該出現在一個成熟兼有品味人仕的腳上

這是個人喜惡的問題, 你可以話我膚淺, 或者唔識貨

不過, 我真係接受唔到

試過有次約一個新對象在中環某星巴克見面

他一進來, 我就立刻不能轉移目光



他居然給我腳踏一雙 白雪雪 嘅CROCS!!!!

當堂對他冇哂興趣, 唯有客氣地飲杯咖啡再說聲goodbye

我信我會有報應的

或許有朝一日, 我偏偏愛上一個着CROCS的人, 仲要係白色嘅CROCS

這個咒好毒....

C人

紅白藍三部曲系列:
F4: 紅白藍三部曲之我係紅
WWW: 紅白藍三部曲之藍.色

假髮

因為化療的關係, 阿媽現在禿頭

於是她去買了一頂假髮

個髮型呢.........十足十《巴不得爸爸》內胡囧囧的奧米加頭

兩旁髮脚會向上翹起的

我第一眼見到真係忍唔住, 足足笑咗成分鐘都收唔到聲

C人

來識我吧

要dating, 都要揾個對象先

其實現在真係冇心機在網上識人, 大家素未謀面就己經要做個慢長的interview

什麽資料都在msn講哂了, dating時都唔知仲有乜嘢好講

而且就算在msn幾啱傾都好, 見面時又是另一回事

都不需要提那些真人同張相差好遠此等勢利的問題, 雙方面對面時唔過電就是唔過電, 迫不來的


昨天在街上, 遇到一位外國人, 互相對了幾眼, 他就來認識我, 問我要電話

首先, 他為人很大方呀, 想識我就走上前來吧, 我最怕人冇膽又婆媽

而且他好有禮貌, 口齒條理清楚, 道明來意, 不會令人感覺突兀同唔舒服

始終有人對自己有好感, 怎說都是一件樂事

當然, 都未知大家有沒有發展的可能, 不過我好欣賞他的誠意

留了電話給他, 相約喝一杯咖啡也不錯


這不是比在網上識人多一份浪漫嗎

C人

係時候去社交

當全世界人仍然瘋狂地玩《開心農場》的時候, 我每日卻在玩《寵物社交》

其實同《他媽哥池》冇分別, 都是設計一隻寵物, 然後每日帶佢探吓朋友, 釣吓魚, 賽吓跑, 種吓花, 煮吓餸

跟住賺到錢就可以花錢佈置吓間屋, 買嘢俾佢食或者買件靚衫着

係好好好好無聊........但我唔知乜事, 每日樂此不疲繼續玩

其實應該是自己要多啲探吓朋友, 釣吓魚, 賽吓跑, 種吓花, 煮吓餸......


我諗我係時候要揾個人date 吓

C人

我手寫我心

看朋友們的blog 己經成為我一個習慣

有時留意到朋友寫作風格變了, 我會想, 朋友是不是受感情煩惱, 心情係咪唔好

又或者突然出一篇怨Blog, 出事喇, 大家就立刻捉住當事人問發生乜事, 當事人每次實話冇嘢呀, 哈哈哈就扯開了

相對地, 當我想些點感情事的時候, 朋友們又會想我係咪未放低

我信Blog由心生, 你是什麽樣的人, 所寫的blog 不多不少都會透露出點端倪, 盡管文筆包裝得幾好, 弱女就是扮不到烈女, 慾女亦扮不到玉女, 騙不到人的

寫作有趣的是, 手一執筆, 就會不由自主將心裏所想一字一句寫下, 是開心是傷心, 是分享也是抒懷, 都是出於自然流露

心只得一個, 容不下所有千言萬語, 找一個地方將心情寄存, 心才能容得下更值得重要的事

所以呀, 朋友, 假若日後偶己見到我出一篇好怨嘅blog, 請不要擔心, 我很好, 盡管情感是真, 但都是寫出當下坐在電腦面前的心情罷了

怨, 總不能帶隨身的

其實筆一放下, 我就繼績專心玩《面書》的《寵物社交》了, 那有這麽多時間傷春悲秋

C人

Vampire Weekend _ Contra

這隊《吸血鬼週未》是近年我最喜愛的新進樂隊之一, 最近出了第二張唱片《Contra》

這隊擁有美國名校哥倫比亞大學畢業美名加持的樂隊, 由樂隊成員打扮至音樂都給人好乖好開心好正派的感覺

我知我知, 什麽都是包装來的, 不過試試聽他們的歌吧, 那種玩味同初生之犢的感覺是不能騙人的

乖是一回事,但是他們的音樂一點也不沉悶, 相反非常之有趣, 朝氣十足, 古靈精怪的編曲非常可愛

咁即係點呢, 你會問

咪就係我冇咗好耐嘅嘢: 青春

C人

陌生的舊同學

今日在朋友Facebook的連結中竟然見到自己讀中二時的班合照



嘩....已經是二十年前的照片

照計放相的人就是我的舊同學吧, 我打開他的facebook版面一看

是誰呢? 我丁點兒都認不出他是誰, 我們真的同一班過嗎?

他還在相片中Tag了幾個人, 於是再逐一打開看看他們的資料

有人成為飛機師, 有人做了父母, 有人移居外地, 有人變成靚仔靚女, 有人變成師奶阿叔.........

以前大家曾經同一班房上課, 現在人面全非, 看着照片時一點回憶也回有

這種感覺既陌生又奇怪

C人

P.S. 唔駛揾喇, 我是班長, 坐起呀sir隔離嗰個就是我

歸途

上海回程返港往浦東機場的途中, 時間是早上7時

我唔明白點解要搭咁早班機, 前一晚還工作至深夜12點, 唔夠瞓個樣真係好殘

不過, 若不是早起身, 也看不到這麽美的清晨

很多事情, 有時就是講要一個對的Timing


回港後, 知道了搭早機的真相...

原來, 我老板趕住同朋友打台灣牌...

..........吓!?

C人

穿上Bape的梧桐樹

雖然上海工作的兩天完全留在思南路, 不過仍然有值得欣賞的地方

這路段的街道其實真的好美, 一幢幢的古老大屋, 建築各有特色但風格一致, 令整條街道的色調好協調好有味道



最愛街道兩旁的梧桐樹, 冬日之下就只剩下粗壯的樹幹



寒冷的關係, 樹皮剝落後, 樹身尤如穿上一身Bape 迷彩潮服

用手獨碰一下樹身, 啊! 凍的, 好可憐呀樹

C人

還是要工作

在高鐵獲得通過, 林峯得到勁歌亞太區最受歡迎男歌手的同時間(乜事呢個世界), 我在默默地去做好我的工作

今次來上海, 目的是為所參與的設計頂目做最後的裝飾



工作地點是為於上海市浦西思南路, 此路段一帶都是以前法租界遺留下來的法式花園大屋, 屬於上海十一個故舊風貌保護區之一, 當中不少是名人的故居, 例如梅蘭芳及孫中山先生

而這區將會發展成高尚住宅區, 包括將古老大屋翻新為酒店及商業用途, 世博期間亦會用來款待各國代表居住及作宴會用途

我常說自己不似做設計, 似私人助理多一點, 這兩天的工作就是跟隨一位花藝老師學習, 學吓整泥, 插花等等



我就是困在這個廚房裏頭工作, 要說是上海氣温得3-4度啊, 兩手不停做這些手作仔, 真係做到手指頭爆拆, 兼又紅又痛, 一做就做到深夜....



圖是其中一個設計的飯廳, 如果有埋餐具及燭台等擺設就更完美, 可惜貨品給人送錯了去溫洲, 仲冇人通知一聲, 落單發貨有幾難呢, 我想問

在大陸工作就是太多這些勞氣事, 我都無話可說了

C人

我在橋上看世博

在上海兩天, 沒有遊玩, 只有工作

雖然氣温只有2-3度, 但天氣好好, 好舒服

往酒店途中經過令人期待的世博會場





最搶眼的中國館, 大到........老遠便看到一個紅鼎屹立在會場上, 勢有宣示國家要成為世界第一大國的氣焰

遠睇之下, 你話俾我聽, 座中國館同紅磡體育館有乜分別?

其實上海是個好地方, 上海人亦很和善, 不過在行程中, 的確亦受到某些當地人差勁的處事態度, 想說, 中國人若不再學懂禮貌, 搞好管理, 就算國力再强也是徒然

國家 只是突然多了一班暴發户而已

C人

命中注定我買你

話說今季入冬以來, 我的口唇便有長期乾裂的煩惱, 重災區是兩邊嘴角位, 個口一郁就非常痛

已經試了不少潤唇膏, 但效果都不是太理想

再一次多得美容女皇關小姐的推介(我胡亂同佢起了個朶, 唔知佢會唔會打我), 我用了一個超荀價買了這盒Jurlique 嘅 Love Balm 修護霜

真係好好好好好神奇, 只是用了兩天, 口角便再沒有乾裂的跡象, 感到好滋潤, 而且它的味道很香很甜, 非常合我心意

最開心的是我不用再受口唇乾裂的折磨

世上有這麽多不同牌子的潤唇膏, 咁多選擇, 對其他人而言這盒Love Balm未必係最好, 可能有些產品更名貴, 或者更滋潤, 但最重要是同自己配合呀, 唔夾的話就算免費送俾我都冇用

將這道理放於其他事情上都是一樣

我相信, 我都會找到的

C人

假如我拍A片

朋友在Facebook 話想睇我做鷄拍A片

多謝大家厚愛啊! 竟然想我做鷄, 仲要拍埋片俾你哋睇

不過靈光一閃, 我又真係諗到幾個片名囉, 連劇情都諗埋.......乜事呢我

1. Sex Toy Story
故事講我釋演一個有生命嘅吹氣公仔, 俾主人遺棄後, 决定尋找回家的路, 然而歸家途中遇都不少人和事....

2. G點特工
我的身分是一名特工, 專攻G點, 最後卻被組識查出我是內鬼, 於是俾人攻番轉頭

3. 十天diu你有限期
是一部紀錄片, 十日內不停做不停做不停做不停做.................

4. 無痛失身
一個年過三十仍然以為自己是處子之身的宅男, 找盡任何方法令自己失身, 怎料原來他只是一直俾人洗腦, 於是失身完一次又一次

借問聲有冇工作係專門設計A片劇情呢, 我好想做

C人

雨後

網誌標題的照片是Happy先生數月前在日本旅行時拍的, 我問他可否用這張照片做標題背景

他說: 冇問題, 你揀這張照片是因為代表雨過天青嗎?

我答: 不是啊, 我只是鍾意個色tone


上年接二連三發生過的事令心情低落, 原來朋友看在眼內會在意我的狀況, 令我很窩心

感情的事自問對得人對得住自己, 對自己誠實, 其實就再沒有什麽好煩惱了

母親數月前做了乳癌手術, 現正處於休養及進行化療階段, 不過昨日收到手術後的化驗報告, 醫生建議要做埋標靶治療

標靶治療的費用非常昂貴, 除非申請到資助, 母親說若要動用私己錢(包括我的), 她就不會做, 因為完成療程亦不是百分百保證不會復發

當然唔做亦唔代表會復發, 只是復發機會比較大

不過又有誰人可以預計發生的事, 可以做的就盡量做是了, 我是這樣想的, 平常心似乎是最好的做法

再看這張雨後的照片, 發覺無心插柳之下, 的確與自己的心情頗配合

我不信神, 不過就令我想到朋友們最近常說的一句說話

上帝早已預備

C人

安室奈美惠 - Past＜Future

朋友們都說有經歷的人才吸引人, 這大概也是我愛安室奈美惠的原因吧

傳聞自小在沖繩長大的她, 家貧, 每天要步行兩小時去藝能學校上課, 當紅之後喪母, 在事業最高峰時突然懷孕, 嫁個年長20歲的男人, 之後離婚, 事業亦需重新一步一步踏回正軌, 這兩年再度成為日本流行樂的天后

人生真的有幾多個十年呢

回顧過去, 展望將來, 造就了這張新唱片 Part＜Future

選曲好對路, 《My Love》《Bad Habit》好似首首都可以做主打一樣, 平時快歌為主, 今次有首《the meaning of us》, 是我覺得她這幾年來最好聽的慢歌

看安室跳舞永遠是最賞心悅目的地方, 她跳舞好像不費吹灰之力, 輕輕鬆鬆但十分到位, 不過今次在新歌《Fast Car》的 MV 裏面扮Lolitta.....嗯, 乜事呢?

之但係最令人驚嚇的是她最近的緋聞對象是一位叫田村淳的搞笑藝人

真係唔知邊個係田村淳, 上網一查, 嘩嘩嘩, 勁驚! 這個人排爆牙醜到呢, 仲自稱有過400次One night stand......

唉...算了, 既然我們愛有經歷的人, 望就望這次只是她日後的一段經歴吧

C人

一班傻仔

原來我叫大家為碗飯鼓掌, 真係有班儍仔起留言版上不停啪啪啪啪啪囉

哈哈!! 不如下次我叫大家過啲錢落我個户口度好唔好?

C人

我吃的早餐

我是個有吃早餐習慣的人

我的意思是能夠靜靜地安坐着享受一份早餐, 而不是急急忙忙買一個菠蘿包在巴士上硬啃那種

以前在元朗住的時候, 每朝就是在返工途中的巴士上食包, 工作己經這麽辛苦, 連好好享用一份早餐都冇時間, 我覺得真係人生中一件好淒涼的事

有段時期我要的早餐是非常豐富的, 香腸煎雙蛋, 加個五香肉丁麵, 火腿通粉之類, 每日都這樣膽固醇真係好高囉, 仲當自己係後生仔的時候唔理

豆漿加粢飯是我的至愛, 還有暖笠笠的腸粉......

近年口味變清淡了, 牛奶溝穀麥片, 加塊多士或者生果就己經好足夠

Marks & Spencer 有款含蘋果乾的穀麥片, 甜甜酸酸好好吃的

大家不妨買來試吓

C人

好味的滑蛋吉列豬扒飯

是夜我在朋友Bartman同Happy的家中食晚飯



大家看看, 這個滑蛋吉列豬扒飯是不是好精美, 是朋友Happy先生做的, 味道唔駛講當然係好好味

Happy 先生話擔心只得吉列豬扒做餸, 我會嫌太熱氣, 所以特別再做一盆凱撒沙律

我想說Happy 先生,你真係好細心, 連我的飲食習慣也注意, 不過你還不是太了解我的為人

其實只要有人煮飯給我吃, 我從來只會感恩而不會嫌三嫌四的

寫一篇blog來答謝你的晚飯, 算有誠意吧

唔夠的話, 麻煩在看着這篇文章的你們, 請為這個好好味的滑蛋吉列豬扒飯鼓掌, 謝謝!

啪啪啪啪啪(鼓掌聲中.....)

C人

電影會

週日在林生家中舉行了首次的電影會

朋友們平時雖然爛口愛玩愛飲酒, 但其實大家都是文藝青年來的...我估:P

所以電影會打頭陣的是....登登登登....己故波蘭電影大師奇斯洛夫斯基的 <紅 白 藍 三部曲>



看完整套系列, 我最大的感受是:

一口氣看三套戲原來真係好攰(有人提議過揾日煲哂<魔戒三部曲>, 12個鐘喎, 唔該哂)

有些戲似乎不適合一大班人柴娃娃觀看, 大家好容易會分心的 (例如我看到<紅>的時候, 女主角卸妝時我說:點解佢唔用HandyBio機嘅? 卸唔乾淨喎....乜事呢我?)

我極度懷疑朋友們都是蝗蟲轉世, 零食幾乎一包一包未停過, 好勁囉

這位妙芝大小姐一直坐在我的大腿上, 不知她是喜歡我, 還是當我係奴才


戲看完都11點幾, 以為聚會完結了嗎? 後續我們還可以來個facial party

有戲睇兼有facial做, 是不是好美好的一件事?

多謝關小姐每次都細心地準備不同的美容產品給我們試用, 大家最近都愛上做facial

每次做完都覺得塊面極潤兼漲卜卜, 真係好不得了

不嫌跟人口水尾的我都套用吓關小姐的金句: 機會係留俾有準備嘅人

明哂!

C人

木頭鐘

去深圳一趟, 為下星期在上海的工作辦點貨

辦貨地點是一個叫藝展的地方, 內有形形式式的家居擺設用品小店, 每當要做示範單位的時候我都會來這裏搜購擺設或餐具

今日我貪得意買了一個鐘





其實不是什麽新穎的款式, 不過手工做得唔錯, 而且有時間、日期同温度顯示

才人民幣150元, 也沒有什麽好挑剔了

C人

原諒

原諒是一個艱深的課題

我明白, 放過人, 即是放過自己, 心中太多仇恨, 難受的只會是自己

放得低, 路才可以一路好走

不過, 是否每一句"對不起", 都要去接受

當太多人向你說"對不起", 需要每一個都原諒嗎? 不能心胸狹窄一次嗎?

尤其是被人傷害完一次一次一次又一次, 連一句"對不起"都變成不罕有的時候.....

會發覺, 其實不是不能原諒他

只是自己不可能原諒自己。

和風背心袋

連自已都不知何解鍾情買環保袋(我可以為了一個附送的環保袋而買一本平時唔會睇的潮流雜誌; 我竟然會花三百元買一個黑襯藍, 只係尼龍製的susanbijl囉, 好低能), 明義上是少用膠袋(這倒是真的, 是好事), 環保很重要,是我們每個現代人生活上應要注意的事項, 不過當我發覺家中屯績不少環保袋後, 其實又唔係好環保的一件事;

讖悔, 可惜當我在網上見到以下那個環保袋後, 我的確好邪惡地又想擁有一個



這個袋是由一名擁有東京藝術大學染織學博士學位的高橋理子小姐, 將傳統日式圖案現代化, 再配合日本傳統注染技術結合而成的;

我覺得好靚囉, 仿似古時日本人遠行會用布包紮成的背包

借問聲誰人識得網上購物呢(我係低能,唔識)?麻煩可否幫我訂一個,謝謝

http://www.hirocoledge-store.com/sleevebag/sleevebag_index.html

C人

Lady Wa Wa

其實這幅作品早已經放在我的Facebook了, 在這裏展示多一次的原因是......無嘢嘅, 想話過俾新相識的朋友知, 我是有幾分藝術氣質的, 謝謝:P

C人

P.S. 圖中主角為我們最喜愛的女明星Lady Wa Wa, 佢純情又得, 淫盪又得, 戲路好廣, 來年賀歲片賣唔賣座靠哂佢了

攞命三千

我有個朋友E小姐, 新相識咗個對佢好好又細心嘅男朋友, 例如會揸車帶佢去西貢食燭光晚餐, 去中環間Sevva 飲酒睇夜景, 聖誕節仲收到i-phone做禮物, 開心到佢好似中咗六合彩咁, 我諗佢依家瞓覺嘅時候都好似有個衣架掛起個口度, 笑到合唔埋個嘴;

人家熱戀期咁幸福咁sweet, 我們是應該替她高興的, 之但係呢......她大小姐每日起Facebook上不停地曬命,嗰種肉麻骨痺,發哂姣嘅程度真係會攞你命3000;

嗱, 例如以下係佢起Facebook 內嘅留言, 大家快些來認真學吓人哋點解咁叻:


{一看這張相, 就掩飾不了你有多高, 我有多矮.... 後面的月亮都笑了...}

{加了聖誕樹的Sevva, 超浪漫; 雖然那個晚上很冷, 和你緊靠著卻很溫暖}

{北海道3.6燉奶... 不是你帶我來, 還不知道原來看完雙橋景後, 當晚的主角其實是這種又甜又滑的感覺}

{縱然工作辛苦, 至少還有你........}

{又病了, 已很久沒試過病倒在家有人照顧, 好感動}



係咪曬到你有皮膚癌呢? 圖文並茂時看到E小姐那個好假嘅笑容更加頂唔順;

不過又咁講, E小姐上一任男朋友只會帶佢去茶餐廳或粉麵店食飯, 仲要嫌貴, 食魚旦粉竟然唔俾人加5蚊紫菜底,淒唔淒涼先, 所以好難怪佢依家咁囂張囉....

但我想同E小姐的新男友講, E小姐的內在人品同她的甜美文筆是兩個人嚟, 佢遲吓會偷睇你MSN同電話, 小心小心

今日又有新留言了

{日本.....去邊好呢?}

知你去日本了, 自答自答, 想點呀你?

C人

Scrabble

這陣子在 Facebook 不停同朋友玩 Scrabble;

試過一個早上連開4局,大家份工都好似唔駛做咁嘅? 乜事呢?

上網玩 Scrabble 有個好處, 就是電腦會同你自動計分, 又會同你確認生字

要知道以前玩 Scrabble 的時候, 四個人圍埋你估英文真係好叻? 成日砌生字都是"側側膊 唔多覺", 又話係字喎......連發音都唔知點發, 於是大家又攞本字典出來查, 又查不到什麽......

好吧, 到偉大的電腦替你確認生字, 問題又來了, 英文好叻的你們可唔可以話我知以下嘅生字點解:

WEM / VID / NEE / ZIT .................

諸與此類的字每次玩完一局都出現一大堆, 原諒我英文差, 唔識

朋友話放到落去有分數咪得囉, 都係......不過真係唔會有丁點求知慾想知道自己拼出個什麽字來嗎?

尤其是, 大佬呀, 你拼個ZIT 字就拉我50分, 我真係好想知發生乜事囉。

C人

( 後記: 原來ZIT 可以解做暗瘡喎....哦.....OK )

Kings of Convenience - Declaration of Dependence

近期最喜歡的一張唱片

歌曲氛圍都是很淡淡然, 很憩靜, 少了昔日的温暖窩心, 多了一份淒美的情懷

想講 Eirik Glambek Bøe 真係好靚仔, 而Erlend Øye 就好有才華, 兩人合唱把聲好好好好聽

夜深時聽着聽着.....心情總會平靜下來

2010

09年對於自己及朋友們, 都是不能忘記的一年

發生過的事太多太多了, 心情有好一陣子跌落了谷底

從來都沒有抱怨過任何人和事, 我明白的, 要怨天尤人, 不如自己對自己好一點;

感情上總算放下了多年來的一個心結, 結打開了, 發覺根本原來什麽都不是, 沒有什麽好值得留戀;

朋友的事令我明白到, 只要努力生活,充實人生, 他朝有日離開後仍然可以感染及鼓勵身邊所有人, 這一點我會好好地去學習;

家人健康方面, 最差的一段路總算行過了, 雖然還有慢慢長路.........不過讓我發現自己原來都有能力去承擔同照顧人;

與其說09年是捱過了, 我會說各方面都上了一課

所以2010, 我想在這新環境再寫寫看, 看看自己, 或看清多一點這個世界。

C人